ਭਾਰਤ ਖ਼ੁਦ 'ਆਤਮ-ਨਿਰਭਰ' ਨਹੀਂ !!! (ਵਿਅੰਗ)

ਜਦੋਂ ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਕਿਹਾ ਕਿ ਹੁਣ ਆਤਮ-ਨਿਰਭਰ ਭਾਰਤ ਦੇਸ਼ ਬਣੇਗਾ ਅਤੇ ਇਸ ਨੂੰ ਲੈ ਕੇ ਮੁਹਿੰਮ ਚਲਾਈ ਜਾਵੇਗੀ ਤਾਂ, ਮੇਰੇ ਮਨ ਅੰਦਰ ਅਨੇਕਾਂ ਵਲਵਲੇ ਉੱਠ ਰਹੇ ਸਨ ਕਿ ਕੀ ਭਾਰਤ ਇਸ ਤੋਂ ਪਹਿਲੋਂ ਆਤਮ ਨਿਰਭਰ ਸੀ ਜਾਂ ਫਿਰ ਇਸ ਤੋਂ ਬਾਅਦ ਵਾਕਿਆ ਹੀ ਭਾਰਤ ਆਤਮ ਨਿਰਭਰ ਬਣ ਜਾਵੇਗਾ? ਆਤਮ ਨਿਰਭਰ ਭਾਰਤ ਮੁਹਿੰਮ ਦਾ ਮੋਦੀ ਨੇ ਨਾਅਰਾ ਤਾਂ ਲਾਇਆ, ਪਰ ਭਾਰਤ ਨੂੰ ਆਤਮ ਨਿਰਭਰ ਕਿਵੇਂ ਬਣਾਉਣਾ ਹੈ, ਇਸ ਦੇ ਬਾਰੇ ਵਿੱਚ ਕੋਈ ਜਾਦੂ ਟੂਣਾ ਨਹੀਂ ਦੱਸਿਆ।

ਭਾਰਤ ਦੇ ਅੰਦਰ ਪਹਿਲੋਂ ਅਤੇ ਹੁਣ ਵੀ ਕਈ ਵਿਦੇਸ਼ੀ ਕੰਪਨੀਆਂ ਆਪਣੇ ਕਾਰੋਬਾਰ ਚਲਾ ਰਹੀਆਂ ਹਨ। ਵਿਦੇਸ਼ੀ ਕੰਪਨੀਆਂ ਦੇ ਸਿਰ 'ਤੇ ਭਾਰਤ ਦੇ ਪ੍ਰਧਾਨ ਮੰਤਰੀ ਆਕੜ ਰਹੇ ਹਨ ਕਿ ਅਸੀਂ ਆਤਮ ਨਿਰਭਰ ਭਾਰਤ ਬਣਾਵਾਂਗੇ, ਫਿਰ ਪ੍ਰਧਾਨ ਮੰਤਰੀ ਕਦੇ ਵੀ ਇਹ ਨਹੀਂ ਸੋਚਦੇ ਕਿ ਜਿਸ ਮੁਹਿੰਮ ਦੇ ਤਹਿਤ ਉਹ ਭਾਰਤ ਨੂੰ ਆਤਮ ਨਿਰਭਰ ਬਣਾਉਣ ਦੀ ਗੱਲ ਕਰਦੇ ਹਨ, ਉਹ ਦੇ ਵਿੱਚ ਵਰਤਿਆ ਜਾਣ ਵਾਲਾ ਸਾਮਾਨ ਵਿਦੇਸ਼ੀ ਕੰਪਨੀਆਂ ਦਾ ਹੀ ਹੋਵੇਗਾ। ਰੁਜ਼ਗਾਰ ਦੀ ਗੱਲ ਹੋਵੇ ਜਾਂ ਫਿਰ ਕਿਸਾਨ ਮਜ਼ਦੂਰ ਦੀ ਗੱਲ ਹੋਵੇ।

ਹਰ ਕਿਸੇ ਨੂੰ ਮੋਦੀ ਨੇ ਆਤਮ ਨਿਰਭਰ ਬਣਨ ਦੀ ਸਲਾਹ ਦਿੱਤੀ ਹੈ, ਪਰ ਇਹ ਸਭ ਕੁਝ ਬਣੇਗਾ ਕਿਵੇਂ? ਇਸ ਦਾ ਲੌਜਿਕ ਮੋਦੀ ਨੇ ਨਹੀਂ ਦੱਸਿਆ। ਆਤਮ ਨਿਰਭਰ ਬਣਨ ਦਾ ਮਤਲਬ ਹੈ ਕਿ ਆਪਣਾ ਕੰਮ ਚਲਾ ਕੇ, ਖ਼ੁਦ ਆਪਣੇ ਪੈਰਾਂ ਸਿਰ ਖੜਾ ਹੋਣਾ। ਜਿਵੇਂ ਕਿ ਪਿਛਲੇ ਸਾਲ ਭਾਜਪਾਈ ਮੰਤਰੀਆਂ ਨੇ ਕਿਹਾ ਸੀ ਕਿ ਹੁਣ ਪੜ੍ਹਿਆਂ ਲਿਖਿਆਂ ਨੂੰ ਰੁਜ਼ਗਾਰ ਦੀ ਲੋੜ ਨਹੀਂ, ਬਸ ਉਨ੍ਹਾਂ ਨੂੰ ਪਕੌੜੇ ਤਲਨ ਲਗਾ ਦਿਓ, ਜਦੋਂ ਪਕੌੜੇ ਵਿਕਣੇ ਸ਼ੁਰੂ ਹੋ ਗਏ, ਉਹ ਨੌਜਵਾਨ ਬੇਰੁਜ਼ਗਾਰ ਤੋਂ ਰੁਜ਼ਗਾਰ ਵਾਲੇ ਹੋ ਜਾਣਗੇ।

ਅਜਿਹੇ ਵਿੱਚ ਹੀ ਪਕੌੜਿਆਂ ਦੇ ਨਾਲ-ਨਾਲ ਮੋਦੀ ਨੇ ਹੋਰ ਕਈ ਮਜ਼ਾਕ ਪੜ੍ਹਿਆਂ ਲਿਖਿਆਂ ਦੇ ਨਾਲ ਕੀਤੇ ਅਤੇ ਹੁਣ ਵੀ ਕੀਤੇ ਜਾ ਰਹੇ ਹਨ, ਪਰ ਇਸ ਦਾ ਨੁਕਸਾਨ ਕਿਸੇ ਹੋਰ ਨੂੰ ਨਹੀਂ, ਬਲਕਿ ਦੇਸ਼ ਨੂੰ ਹੀ ਹੈ। ਦੇਸ਼ ਦਾ ਵੱਡਾ ਹਿੱਸਾ ਨੌਜਵਾਨ ਇਸ ਵੇਲੇ ਵਿਦੇਸ਼ਾਂ ਵਿੱਚ ਸੈਟਲ ਹੋਣ ਦੀ ਕਾਹਲ ਵਿੱਚ ਹੈ। ਹਰ ਕੋਈ ਸੋਚ ਰਿਹਾ ਹੈ ਕਿ ਭਾਰਤ ਦੇ ਅੰਦਰ ਹਿੰਦੂ-ਮੁਸਲਿਮ ਵਿੱਚ ਵੰਡਣ ਦੇ ਨਾਲੋਂ ਵਿਦੇਸ਼ਾਂ ਵਿੱਚ ਰਹਿ ਕੇ ਇਨਸਾਨੀਅਤ ਦੀ ਸੇਵਾ ਕੀਤੀ ਜਾਵੇ ਤਾਂ, ਬੇਹੱਦ ਚੰਗਾ ਹੋਵੇਗਾ। ਆਤਮ ਨਿਰਭਰ ਤੋਂ ਮਤਲਬ ਕਈ ਨਿਕਲਦੇ ਹਨ।

ਆਤਮ ਨਿਰਭਰ ਤੋਂ ਇੱਕ ਇਨਕਲਾਬੀ ਨੇ ਮਤਲਬ ਕੱਢਿਆ ਤਾਂ, ਪਤਾ ਲੱਗਿਆ ਕਿ ਜਿਸ ਹਿਸਾਬ ਦੇ ਨਾਲ ਕੋਰੋਨਾ ਕਹਿਰ ਦੇ ਦੌਰਾਨ ਕਈ ਹਿੰਦੂਆਂ ਨੇ ਮੁਸਲਮਾਨਾਂ ਕੋਲੋਂ ਸਬਜ਼ੀ ਜਾਂ ਫਿਰ ਹੋਰ ਸਾਮਾਨ ਨਹੀਂ ਸੀ ਖ਼ਰੀਦਿਆ, ਬਲਕਿ ਉਸੇ ਤਰ੍ਹਾਂ ਹੀ ਹੁਣ ਇਹ ਆਤਮ ਨਿਰਭਰ ਹੈ। ਹਿੰਦੂ ਸਿਰਫ਼ ਹਿੰਦੂਆਂ ਵਿੱਚ ਜਾ ਕੇ ਹੀ ਆਪਣਾ ਸਾਮਾਨ ਵੇਚ ਸਕਿਆ ਕਰਨਗੇ ਅਤੇ ਮੁਸਲਮਾਨ ਸਿਰਫ਼ ਮੁਸਲਮਾਨਾਂ ਵਿੱਚ। ਪਰਿਭਾਸ਼ਾ ਮੋਦੀ ਦੀ ਬੜਾ ਕੁਝ ਕਹਿੰਦੀ ਹੈ, ਪਰ ਇਸ ਨੂੰ ਗਹਿਰਾਈ ਦੇ ਨਾਲ ਸੋਚਣ ਸਮਝਣ ਦੀ ਲੋੜ ਹੈ।

ਭਾਰਤ ਨੂੰ ਆਤਮ ਨਿਰਭਰ ਬਣਨ ਨੂੰ ਹਾਲੇ ਕਈ ਸਾਲ ਲੱਗ ਜਾਣੇ ਹਨ। ਕਿਉਂਕਿ ਭਾਰਤ ਦੇ ਅੰਦਰ ਹਾਲੇ ਧਨਾਢ ਕਾਰਪੋਰੇਟ ਘਰਾਨਿਆਂ ਨੇ ਆਪਣੀ ਧੌਂਸ ਜਮਾਈ ਹੋਈ ਹੈ। ਉਕਤ ਕਾਰਪੋਰੇਟ ਘਰਾਣੇ ਦੇਸ਼ ਨੂੰ ਲੁੱਟਣ ਵਿੱਚ ਲੱਗੇ ਹੋਏ ਹਨ, ਪਰ ਹਕੂਮਤ ਇਹਦੇ ਵੱਲ ਧਿਆਨ ਨਹੀਂ ਦੇ ਰਹੀ। ਉਕਤ ਕਾਰਪੋਰੇਟ ਘਰਾਨਿਆਂ ਦੀ ਸੈਟਿੰਗ ਵਿਦੇਸ਼ੀ ਕੰਪਨੀਆਂ ਦੇ ਨਾਲ ਹੈ ਅਤੇ ਉਹ ਵਿਦੇਸ਼ਾਂ ਤੋਂ ਸਾਮਾਨ ਲਿਆ ਕੇ ਭਾਰਤ ਦੇ ਅੰਦਰ ਵੇਚਦੇ ਹਨ, ਜਿਸਦੇ ਕਾਰਨ ਭਾਰਤ ਦੇ ਅੰਦਰ ਮਿਕਸ ਜਿਹਾ ਹੋਇਆ ਸਾਮਾਨ ਵਿਕਦਾ ਹੈ। 

ਆਤਮ ਨਿਰਭਰ ਬਣਾਉਣਾ ਹਾਲੇ ਭਾਰਤ ਲਈ ਸੌਖਾ ਨਹੀਂ। ਭਾਰਤ ਦੇ ਪ੍ਰਧਾਨ ਮੰਤਰੀ ਤਾਂ ਖ਼ੁਦ ਆਤਮ ਨਿਰਭਰ ਨਹੀਂ ਹਨ, ਕਿਉਂਕਿ ਉਹ ਆਪ ਕਦੇ ਵੀ ਕੋਈ ਕੰਮ ਨਹੀਂ ਕਰਦੇ। ਲੋਕਾਂ ਵੱਲੋਂ ਦਿੱਤੇ ਗਏ ਟੈਕਸ ਦੇ ਨਾਲ ਹੀ ਉਹ ਚੱਲਦੇ ਫਿਰਦੇ ਹਨ ਅਤੇ ਲੋਕਾਂ ਦੇ ਟੈਕਸ ਰੂਪੀ ਪੈਸੇ ਨਾਲ ਸੈਰ ਸਪਾਟੇ ਅਤੇ ਜਹਾਜ਼ਾਂ ਦੇ ਝੂਟੇ ਲੈਂਦੇ ਹਨ। ਆਤਮ ਨਿਰਭਰ ਬਣਨ ਦੇ ਲਈ ਮੋਦੀ ਨੂੰ ਟੀਵੀ 'ਤੇ ਲਾਈਵ ਪ੍ਰੋਗਰਾਮ ਛੱਡ ਕੇ, ਖ਼ੁਦ ਮੈਦਾਨ ਵਿੱਚ ਉੱਤਰ ਕੇ ਹੱਥੀਂ ਕਿਰਤ ਕਰਨੀ ਪੈਣੀ ਹੈ। ਫਿਰ ਜਾ ਕੇ ਕਿਤੇ ਭਾਰਤ ਆਤਮ ਨਿਰਭਰ ਬਣੇਗਾ।

ਨੋਟ:- ਉਕਤ ਵਿਚਾਰ ਲੇਖਕ ਦੇ ਆਪਣੇ ਨਿਜੀ ਵਿਚਾਰ ਹਨ, NewsNumber ਇਨ੍ਹਾਂ ਵਿਚਾਰਾਂ ਲਈ ਜ਼ਿੰਮੇਵਾਰ ਨਹੀਂ ਹੈ।